Adžahar ka dotakninol tut o Nacionalnikano spisako iljačenge

Tu šaj te dikhe save iljačia hem avera artiklia so hramondžepe tuke hem vazdindžan tari i apoteka, maškar aver ki digitalno služba Läkemedelskollen. Taro o 1 maj 2021 ka ovel polokho te delinelpe akaja informacia e sastipaskere personalea keda ka rode arakhiba. I informacia ka arakhelpe ko registari ko Nacionalnikano spisako iljačenge.

Tu našti te odlučine so tle receptia hem tlo vazdiba te na registririnenpe ko o Nacionalnikano spisako iljačenge. Isto našti te odlučine tle pobare trošakia te na oven registririme. Odoleske čhivenape bare zahtevia či te arakhenpe tle podatkia – sade e sastipaskoro hem e apotekakoro personali tane kvalificirime te dikhen i informacia bašo tle recetia hem olengoro vazdiba. 

Keda ka vizitarine e sastipaskere služba

E sastipaskere službake valjani ispravno kvalifikacia či te dikhel i informacia bašo tle receptia hem olengoro vazdiba. Isto valjani olenge tlo soglasiba či te dikhen i informacia. O soglasiba dea jekhe doktoreske, sastipaskere phenjake, dandengere doktoreske ja avere sastipaskere personaleske. Ko disavo izuzetno slučaj ola šaj pale te dikhelpe i informacia, ko misal keda našti te pučen tut bašo tlo sosglasiba ko misal te sian onesvestimi.

Tuke so sian dospacienti važinena avera pravilia nego avere pacientenge.

Te na mangljan te de tlo soglasiba

Bizo tlo soglasiba o kvalificirimo sastipaskoro personali šaj te dikhel te hramondžape tuke posebno iljačia telo duj berš dive. Odova kerelape či e sastipaskere personale te ovel šaipa te identifirinel hem te čhinavel e iljačengoro pogrešno koristiba ko misal iljačia klasificirime sar narkotika.

Te mangljan te garave i informacia e sastipaskere personalestar

Tute isi hako te garave e sastipaskere personalestar o specifikane receptia hem olengoro vazdiba. Tegani na sikavenape o podatkia e sastipaskere personaleske, keda ka soglasinepe so ola šaj te dikhen tle receptia hem o vazdiba. Ama ola šaj te dikhen so isi garavde podatkia.

Tu šaj te koristine o Läkemedelskollen či te garave jekh podatko ko o Nacionalnikano spisako iljačenge. Tu šaj pale keda ka mange te sikave o podatkia.

Iako tu garavea o podatko šaj te sikavele e sastipaskere personaleske, ko misal ko akala situacie:

• te sian ki jekh akutno situacia hem našti te de tlo soglasiba
• te sian jekh dospacienti
• te o podatko tano ko pacienteskoro kartoni sastipaske – tu isto ka valjane te garave i informacia ko tlo sastipaskoro kartoni či e sastipaskoro personali našti te dikhel.

Šaj te ovel rizično te garavelpe e iljačengiri informacia

Ako tlo doktori našti te dikhel i informačia bašo iljačia ka ovel pharo te izbeginelpe o iljačia so sprotivstavinenape ja reagirinena negativno jekhe averencar. Odova značinela so šaj te ovel rizično te garavelpe informacia. Te garavdžan receptia hem vazdiba mora korkoro te vakere e sastipaseskere personaleske či te šaj te den tut jekh šukar hem sigurimo sastljariba.

Garav lilale receptengoro vazdiba

Tu šaj te garave o vazdiba so keržape hem so ka kerelpe ko lileskere receptia či e sastipaskoro personali našti te dikhel olen ko ple sistemia.

Taro 1 maj 2021 ka registririnenpe e lileskere receptia, disave izuzetkoncar, ko Nacionalnikano spisako iljačenge angleder te denpe o iljačia. Či te garavenpe akala vazdiba ka valjani te garave odova recepti so pripadinela e vazdibaske.  

Keda ka vizitarine jekh apoteka

Či e apotekakoro personali ka šaj te delinen tle artiklia ola šaj sako far te dikhen tle receptia hem vazdiba, ama olenge ka valjani tlo soglasiba či te dikhen o sebepi e sastljaribaskoro ko recepti.

Tu šaj te garave o sebepi e sastljaribaskoro

Tu šaj te garave o podatko e sastljaribaskoro ko jekh recepti. Te e apotekakoro personali smatrinela so ola valjani te dikhen o sebepi e sastljaribaskoro či te delinen tuke tlo artiklo, ka valjani olenge panda jekh soglasiba tutar.

Tlo recepti šaj te saikerel hem o sebepi sastljaribaskoro hem o cili e sastljaribaskoro. Tu šaj sade te garave o sebepi e sastljaribaskoro ko recepti. E apotekakoro personali pale šaj te dikhel o cili e sastljaribaskoro.

Keda rodea godidejba bašo tlo iljačeskoro koristiba

Te e apotekakoro personali mangela te dikhel tle receptia hem vazdiba či te del tut godidelba bizo te delinel diso, e apotekakere personaleske ka valjani tlo soglasiba. O cili e sastljaribaskoro ko jekh recepti niked ka sikavelape pri dejba godi.

Te garavdžan jekh recepti ja e recepteskoro vazdiba, ja vazdiba ko lileskoro recepti e sastljaribaskere personaleske, hem odova na sikavela e apotekakere personaleske pri godidejba. E apotekakoro personali na dikhela so garavdžan informacia ko Nacionalnikano spisako iljačenge.

Tu šaj te koristine o Läkemedelskollen

Tu šaj te dikhe informacia bašo tle receptia hem vazdiba ko but čania: ko ispisia tari i apoteka, ki e- trgoviakiri apoteka hem ki digitalnikani služba Läkemedelskollen. Ki Läkemedelskollen isto šaj te garave podatkia. Tu šaj bilo keda pale te sikave o podatkia.

Poednostavno šaj te vakerelpe so o Läkemedelskollen tano jekh džami prema o Nacionalnikano spisako iljačenge. Tut so isi 18 berš hem isi tut e-legitimacia šaj akava te kere ko Läkemedelskollen:

• te dikhe o iljačia so tu, tle čhave telo 13 berš ja tle kherutne džanvaria, dobindže ko recepti
• te dikhe so vazdindžen ki apoteka
• vastingaren hem te registririnen punomoštvo e apotekakere bučenge
• te dikhe kobor ačhilo tut dok o popust bašo o pobare trošakia stupinola ki snaga
• te ikale izvod ko podatkia so isi baši tute ko registar Nacionalno spisako iljačenge hem ko Receptengoro depo Džanvaria.

E Läkemedelskollen šaj te dobine ko 1177 Vårdguiden ja E‑sastipaskere upravakoro vebthan.

Te na sine tut šaipa te koristine Läkemedelskollen, šaj te kontaktirine e sastipaske upravaja či te zahtevine te garavelpe jekh podatko ko Nacionalnikano spisako iljačenge Tegani khere ka dobine jekh blanketa so ka phere hem ka bičhave palal ki E- sastipaskiri uprava. Bičal ki e-pošta registrator@ehalsomyndigheten.se te mangljan te poručine jekh blanketa. Šaj isto te akhare amen ko 0771–766 200.

Podatkia so šaj te oven garavde e starateleske hem e zastupnikoske

E sastipaskoro personali so tano kvalificirimo te propišinel iljačia šaj te garavel podatkia ko jekh maloletno pacienteskoro recepti sebepi službeno garaviba. Akala podatkia šaj te oven garavde jekhe maloletno pacienteskere starateleske hem zastupnikoske:

• jekh recepti hem receptakoro angluno hem avutno vazdiba
• sa o vazdiba so kerdžepe e lileskere receptencar.

Podatkia so tane garavde taro o starateli hem zastupniko na sikavenape ko jekh ispis taro o Nacionalnikano spisako iljačenge ki jekh apoteka, bizi razlika koj mangela te dikhen odova. Akava isto važinela ko slično čani ispisa ki e-trgovia.

O dnevniko pristupibaske sikavela koj dikhlja tle podatkia

Ko Läkemedelskollen arakhea jekh dnevniko pristupibaske. Akate ka dikhe i informacia bašo keda, soske hem savi strukakiri uloga hem kotar džiko diklja i informacia bašo tle receptia hem vazdiba.